- لكل منا عيوب وانا بكتب عيوبي عساها تتغير واتمنى انها تتغير بقدره قادر واتمنى في يوم من الايام ارجع هنا واشخمط على لو عيب واحد تغير فيني _اني اكره شغل البيت اكرهه كره موطبيعي خاصه المطبخ وتبعاته مااحب في المطبخ الا محتوياته خاصه اللي بوسط الثلاجه هاالنقطه تؤرقني تتعبني الحمدلله خواتي اللي اكبر مني ماهرات خاصصه اختي الكبيره مشاءالله ابداااع>>مره اقول لااختي باالله صلحي لي حلاء اوديه بكره لصقيقاتي واعطيك اي بلغ تبينه تقول خير ان شاءالله المطبخ هناك يقول يامرحبا خخخ, ودايم امي تتحلطم على شغلي لانه ناقص او غير مرضي هذا غير الاكل اللي الله يعز النعمه ماافلح الا ي الشاهي >>اكيد حبيب البي والقهوة صديقاتي دايم يفشلوني وش هاالقهوة المخيسه والله اتحلطم كثير اذا رجعته معي للبيت وماشرب منها الا وحده ومجامله كثر خيرها يعني الشاهي لعبتي غيره فاشله فشل ذريع امي تقول ليتك زي البنات تعرفين شغلات وحركات وطبخات ومدري ايش قلت يمه حبيبتي عائشه قدوتي رضي الله عنها ماقد سمعت انها سوت حلاء ولا سوت شي يعني من الاشياء اللي قاعدين بنات اليوم يسوونها ولا بعد عندها جاريه قالت امي طيب وفاطمه رضي الله عنها لماراحت لرسول تبغى خادم الرسول وش رد عليها هنا ماقدرت ارد ولا اقول شي بس وش اسوي مااواطن المطــــــــــــــــــبخ
-
- في الطعشات من عمري كنت اغطي عيوني بس في العشرينات او قبلها صرت مااغطيهم الا في حالتين الاولي جماعتنا الثانيه اصحاب محلات الجوال لانهم الله يصلحهم طاولتهم شبر يعني وجهي قريب من صاحب المحل شي يخوف بصراحه وهذا العيب يؤرقني اشوف اني منافقه من الدرجه الاولى يارب لاتواخذني واعف عني اللهم اني اعوذبك ان اشرك بك وانا اعلم واستغفرك لما لااعلم
- _فيه بنت من الضيعه لهاالحين وانا اتحسب عليها صبح مساء سرا وجهارا عجزت عجزت عجزت انسى واسامح حسبي الله عليها ونعم الوكيل عشان كيذا مااقدر انصح اي احد متهاوش مع شخص ثاني واقوله ترى الدنيا فانيه والمسامح كريم مااقدر لاني ماغفرت لهاالبنت الح…..حسبي الله عليها سوت لي شي خلتني خلتني مااقول الا حسبي الله عليها ونعم الوكيل الشريره الله ينتقم لي منك ودي اقول الموقف بس قلبي يتقطع يتقطع شعور لايوصف اللي اببغى اصير متسامحه ماقدرت
- _ملقــــــــوفه احب اشارك امي هوشاتها لااخواني خخخ بس شي يقهر اني مااواطن احد يدخل لاصارت امي تهاوشني ومع ذلك ادخل في هوشاتها لهم بس كني خفيت يارب
- اذا احد مدحني في شيئا ما مااستحي ولا اقول شوكرن ولا اسوي شي يبين للمادح اني اشكره ابدا اكمل مدحته لي مثال :رهيب لبسك ياساره مشاءالله كووشخه
- وارد بكل بشاعه طول عمري كشخه مامن جديد خخخخ اقول لصقيقاتي ماتنقهرون من الاسلوب بس يضحكون
- شي مخجل ومحزن اني التجي لربي وقت الشدايد _يارب سامح بس اذا ماالتجت لك من التجئله زي مثلا اليوم حاطه ع ام بي سي وهات يااغاني ولما طفى الكهرب وزاد الحر وضاقت علي الوسيعه رحت وغيرت المحطه وحطيت اذاعه القران الله واكبر ويني عنها قبل مايطفى الكهرب شي مخجل
- _اكره المناسبات الاجتماعيه ومفروض احبها لانها من الوصل بس احس اني البس قناع ومجاملات لاتنتهي وودي بسرعه يخلص الوقت بس اللي احبه اني التقيهم بعرس نسلم ع بعض بس غيره واحب ابداا
- ثقتي استمدها من لبسي غيره مااقدر اذا لبست لبس عاادي ومو ذاك يتغير يومي وياثر ع تواصللي مع الغير يعني فيني هياطه شوي ع قولة امي بس سبحان الله اذا لبست لبس مو غالي احس الكل يعرف قيمته لتذهب المهايطه للجحيم ياحلاة التواضع بس
- راجعتـــــــــــــــــــــــــــــــــــــــــــــــــــــــــــــــــــــــــــــــــــلك ان شاءالله ياحزم الضامي بشوف انا تغيرت ولا مكانك سر___________الترقيم خطا بس عاجزه ارتبه يعني عشره مو تسعه عساها تنقص
Like this:
Be the first to like this post.
هذه المدخلات نشرت في يونيو 16, 2009 في 11:22 م من في نفسي شي . You can follow any responses to this entry through the RSS 2.0 feed
You can leave a response, or trackback from your own site.
